Batšofe ba bula mokgahlo wa bona o moswa
Ka Tebogo Senosha
Batšofe ba kgobokane Ga-Rankuwa Zone 14 go bula lekala la bona le leswa la mokgahlo wo o bitšwago New Settlement Pensioners Association wo o thomilwego ke Mohlomphegi Alfred Nkomo go la Winterveldt ka ngwaga wa 2003 pele a hudugela motseng wa Ga-Rankuwa ngwageng wa go feta. Maikemišetšo magolo a go hlangwa ga lekala le le leswa go la Ga-Rankuwa ke go leka go thuša batšofadi ka dilo tše bohlokwa bjale ka go ba fa dijo le go ba thuša ka dinamelwa ge ba ya go gola mphiwafela wa bona kgwedi ka kgwedi mafelong ao a fapanego.
Mokgahlo wo o moswa go la Ga-Rankuwa o ikana go thuša batšofe ba ga Zone 1 le ba dinaga mabapi, ebile o ikemišeditše go šoma ka ditaelo le melawana ya lekala-legolo la kua Winterveldt.
Moketeko wa pulo ya lekala le leswa go la Ga-Rankuwa e bile wa katlego e kgolo kudu, ka ge o ile wa gokagoketša batšofe ba bantši le maloko a mokgahlo-mogolo wa kua Winterveldt. Go batho bao ba bego ba tlile moketekong wo, bontši e be ele bakgekolo. Mothuša modula setulo wa Democratic Alliance(DA) go la Zone 14 le yena o be a le gona go bao ba tlilego moketekong wa pulo ya mokgahlo.
Mohlami wa mokgahlo, Mohlomphegi Alfred Nkomo wa megwaga ye masome senyane tee o lebogile batho ka moka ba o ba kgonnego go tšea nako ya bona go tla go ba ema nokeng moketekong wa bona.
"Ke rata go tšea sebaka se ke leboge batho ka moka go re thekga ka dinako ka moka kudu kudu babegi ba ditaba ka ge ba re thuša go phatlalatša moketeko wa rena gore batho ba tsebe ka ga wona. Kena le mengwaga ye masome senyane tee lehono ebile le ge nka hlokofala lehono, ke rata gore le tšweIe pele go thuša batšofe ba rena mo motseng,” a realo Nkomo.
"Le ge ele gore ke tšofetše ebile ga ke sa kgona go bona ka mahlo, ke le kgopela gore le seke la ikgogela morago ge le nyaka tshedimošo ka se sengwe seo se ka kaonafatšago le go iša mokgahlo pele, le ge e ele gore le nyaka gore ke sepele le lena re ye go bolele le baetapele ba Mmasepala, nka ya le lena gobane ke na le taba le batšofe ba rena mo motseng ebile ke rata go bona ba hlokometšwe,” a tšwela pele.
Mohlomphegi Nkomo o tšwetše pele ka go kgalema ka bogale mmušo wa ANC wa mo gae mabapi le go se hlokomele batšofe mo motseng.
"Ge pula di ena mo Zone 14, re gapeletšega go ikhupetša maoto ka dipolasitiki ka lebaka la gore ditsela di a thedimoša ebile di na le seloko. Ga rena ditsela tša maleba ebile ge gona le mahu mo motseng, dikoloi di šitwa ke go fihla mabitleng ka lebaka la ditsela tšeo e sego tša maleba,” a ruma ka go realo Nkomo.
Mohumagadi Eva Makhubela yo elego mosepediši wa mokgahlo wa New Settlement Pensioners Association o lebogile batšofe ba mokgahlo ka tshwaragano mmogo ya bona le go thušana ka dikgopolo tša go roka diaparo tša setšo gore ba di rekiše gomme ba ihweletše letseno.
Mohumagadi Makhubela o rile, "Ke bona tšwelopele ye kgolo go batšofe ba rena ge ke ba bapetša le nakong yela mokgahlo o sa thoma go la Winterveldt mengwageng ye mmalwa ya go feta. Batho ba go swana le Morena Nkomo ke batho ba bohlokwa kudu mo setšhabeng ebile ba swanelwa ke go hlokomelwa le go hlomphigwa".
"Go tloga mola ke bago leloko la mokgahlo wo ngwageng wa go feta, ke ikwa ke thabile kudu ka dinako tse dintši gobane mokgahlo wo o re thuša go fokotša kgatelelo ya monagano ka ge re kgona go bolela le batšofe ka rena mabapi le se sengwe le se sengwe seo se re tshwenyago maikutlo. Ke duma okare le bao ba tlago ka morago ga rena ba ka tšwetša mokgahlo wo pele ge rena re šetše re tlogile mo lefaseng le,” a realo Mohumagadi Betty Mokgobati, o mongwe wa leloko la New Settlement Pensioners Association.
Sehlopha sa mmino sa New Settlement Pensioners Association se ile sa namela sefala sa opela dikoša tša bona tšeo di ilego tša emiša batho ka maoto gomme ba hlaba mekgoši le go bina ka lethabo le legolo.
No comments:
Post a Comment